Petang lum lame ni Pak Beluk kedatangan tamu damping nilah, Merin. Ughang due ni entah siang entah malam kumpul babal. Pokoknye jangan nian endik betemu agak saghi. Lah saling WA ape nelepon.
“Ui Pak Beluk, kemane rencane pagi?” tanye Merin.
“Ngape pule kaba nanye-nanye ni, teserah aku ndak ke mane. Kepo nian,” timbal Pak Beluk.
“Nah...Serius aku ni. Men ndik kah bepegian, kite ngaruhkan ghepang nening kami saje. Ceritenye lebat buah deghian,” kate Merin.
“Adak lasung benagh ce. Anye aku pagi ndak nginak kebun sawit kudai, jeme ndak panen. Men diawasi galak asak galak tukang panen ni. Kele tepanen ngah kebun jeme. Laju aku ye tegintan,” jawab Pak Beluk.
“Lukmane men luse?” Pak Beluk ngejuk masukan.
“Luse...Lasung juge. Kite njak diakap anye. Mbatak senampang burung, entah betemu ngah tampilan. Mbatak pikat ayam beruge pule, mbatak bubu pule,” uji Merin becancung.
Mangke tu ade gelas damping Pak Beluk, isinye warna kuning luk teh.
“Tumben-tumben kaba ni minum teh. Biasenye ngopi tulah,” kate Merin sambil ngambik gelas dan langsung minumnye. Abis mbelahan.
“Ngape ase teh kaba ni lain??” Merin penasaran.
“Adak ukan die teh titu, minyak manis. Tulah jangan asak galak,” kate Pak Beluk, sambil tetawe.(*)