PAK Beluk kini mulai ngikuti tren jeme kekinian, neril ke ghimbe. Kini Pak Beluk lah cak pakam nian, pakai sepatu trail ye alap nian.
Nginak lakinya ajam nian, ndung Yung Pantit belikah motor trail ye iluk pule. Seminggenya penampilan Pak Beluk meyakinkah nian antakah berangke neril tu. Merin tiap Pak Beluk neril selalu diajak, maklum butuh pengawal kenan tu.
Singkat cerite, neril minggu ini udim hujan. Ditambah agi lokasi raban tu masuk jalur banyak tanjakan dan turunan ye tinggi.
Awalnye Pak Beluk masih cak stria baja hitam nian, dide ngaju makai motor. Tapi waktu di tanjakan tinggi pertame Pak Beluk lah tejungkang sekali.
Pak Beluk nampak nahan sakik ketingnye te jepit mesin motor, tapi untung sepati alap. Jadi keting kenan dide ada ape – ape.
Jeme bedue tu laju agi, kini di tughunan tinggi. Pak Beluk mulai tekejut nian, nampak daghi kenan agak mucat.
Ngecak setang motor lah mulai gemetar pasang udim, semingge kenan tegas. Sehingge die tejengkang pasang udim, bahkan umban terukup nian.
Udim tebanting tu Pak Beluk ngajak Merin istirahat kudai, kenan ngajak Merin ngudut dan besenai dikit.
“Ngape kabah gugup tadi bapang Yung,” tanye Merin dengan Pak Beluk.
“Ntah ce, biasenye aku dide model ini. Tapi ngape aku hari ini agak gugup, semingge salah gale berabal di setang motor,” sampai Pak Beluk.
Timbal Merin “Mungkin karene medan baru ini, semingge kabah belum pasih nian”.
“Munkin juge nian, sebab aku belum hapal jalannye,” sebut Pak Beluk agak kikuk.
Tambah Merin “Tapi ngape kabah pucat waktu tughun tadi bapang Yung. Beda pendahian kabah waktu naik tanjakan. Ade ape ini, nampaknye ade kabah rasiekah dengan aku. Tebukak saje ce, aku ye ngawal kabah tiap neril ini”.
“Jujur saje ce, aku sebnarnye kalau naik tebing dide takut makai motor. Ukurannye motor tejungkang, tebanting. Annye kalau tughun tebing itu, nginak ke bawah tu serase hilang nyawe di badan,” sampai Pak Beluk jujur.
“Cacam, berarti kabah ini tukang trail tekasai tughunan. Aiii, nduk bapang Yung. Jeme ye lemak tughun tulah ndai pade naik, tinggal nggesur saje,” sampai Merin sambil tetawe.