Pak Beluk ngah Merin ni sedang kepusingan, karne alangkah banyaknye undangan datang ke ghumah udim lebaran ni. Karne kalu kah didatangi gale ndik beduit untuk masukah amplop. Tapi kalu ndik didatangi madak nian, masih sekance.
"Lukmane itu au mangke kite pacak datangi gale undangan ni, ndik beduit pule untuk ngisi amplop ni," kate Pak Beluk ngeluh ngah Merin.
"Au nian, aku juge peningan ini mane ndik beduit, jeme ni nikahan banyak pule. Jeme ye nikahnye kite ye peningnye kalu mbak ini," jawab Merin.
"Jeme nikahan tu besenang-senang ce, kitelah ye menderita mikirkah ngisi duit amplopnye ni," kate Pak Beluk.
"Ape solusinye ni mangke kite pacak datangi gale undangan ni," tanye Merin.
"Ndik pule beamplop, ye penting kite nginakkah muke depan kance kite, nah lah tahuinye kite hadir di nikahan die, ngeti pule die," kate Pak Beluk ngenjuk saran.
"Aih ndik lemak aku, lukmane ngakali ini," kate Merin.
"Naah itulahkan, malah kite datang tapi jangan makan, kele ndik diikhlaskah jeme kite makan nasi beligat tapi ndik batak amplop," kate Pak Beluk tetawe.
"Amu kateku kite chat saje kance kite tu, kalu kite ndik pacak datang karne ndik beduit tuk ngisi amplop," kate Merin.
Lum lame lah chat Merin ke kance ye nikahan ni tadi, kalu die bedue Pak Beluk ndik pacak datang. Karne ndik beduit ngisi amplop, tapi kate kancenye ndik ngape de beamplop ye penting hadir di acara bahagia die. Makan sesame ngah keluarga di acara nikahan die.
"Nah kan ape kateku, ndik ngeharapkah amplop nian kance kite ni, ngerti die tu. Alhamdulillah pacak makan beligat gratis tanpa bawe amplop," kate Merin sambil tetawe riang.
"Au alhamdulillah, kalu Yung Pantit nikah nanti ndik ndak aku serempak ngah musim kawin udim lebaran ni. Kele kabah ndik batak amplop pule tapi makan beligat," kate Pak Beluk tetawe.