Petang kemaghi Pak Beluk berayak ke rumah Merin. Singkat cerite, die cerite panjang libar masalah care ibadah pada sang pencipta ini. Puase, salat, bersedekah dan beamal yang lain ndak dikerjokan gale bulan suci Ramadan penuh berkah.
Anye Pak Beluk banyak belum ngerti yang batalkan pause ape saje. Die cuma diajari Yung Pantit anak semate wayang yang ngingilan tu.
“Merin, aku ndak nanye masalah puase ni,” kate Pak Beluk.
“Tanyekan lah gale, anye kite same belajar masalah puase ni,” timbal Merin.
“Yang batalkan puase ape saje?” tanye Pak Beluk
“Banyak yang batalkan puase. Mulai jak mate, telinge, mulut, penciuman sampai perbuatan pacak batalkan puase gale,” uji Merin
“Yak amen iluk itu, de kah jadi puase akuni,” uji Pak Beluk agi.
“Ngape pule puase mu dengan perbuatan mu. Ape ade salah pacak dibenari,” timbal Merin
“Nginak jande de bulih?”kate Pak Beluk agi.
“Bulih, anye jangan macam-macam. Cuma tekinak saje udim tu jangan macam-macam, jangan pakai ngedep-ngedip mate mu,” nasehat Merin.
“Kalu kentut dengan buang air, batal ape de?” uji Pak Beluk agi.
“De batal amen urusan itu,” timbal Merin agi.
“Kate Yung Pantit amen kentut dengan buang air batal gale,” uji Pak Beluk.
“Amen itu batal aku angkat tangan puase,” uji Merin
Masalanye puase pertame Pak Beluk dengan ndung Yung Pantit de pacak tiduk. Tepeluh kuning amen kate jemetu. Pesan Yung Pantit jak kawannye, amen kentut dengan buang air batalkan puase.