BELUM lame ni Merin lah nyebarkah undangan lah ndak bebibai baru.
Bibay Merin katah jauhnye ndak nyebrang pulau due kali. Kalu naik pesawat due kali transit, semingge kenan pisah. Karene bini kenan dide galak nunggu tubang.
Nginak Merin lah nyebarkah undangan, Pak Beluk asekah gile. Karne CS Pak Beluk lah nikah agi, sementare tare kenan silire nian. Anye dide berani dengan ndung Yung Pantit, sebab bakal balak besak.
"Agak sedih aku nginak kabah Merin, sebab kabah kah nikah agi. Sendauk dengan bini kabah ye lame, janganlah ce," kicik Pak Beluk.
"Maaf nian bapang Yung. Ukan ne luk itu, kemaghi aku bepikir semegi dengan kabah. Anye lelame sughang di ghumah madak pule, sare nyesah dan masak sughang ce," jawab Merin.
Pak Beluk lah tahu bakal calon Merin, belagak. Kenan juge selire, oleh sebab itulah Pak Beluk ngerayu Merin, "Yak Rin jangan kudai, pikir – pikir kudai. Siape tahu bini kabah lame kah balik agi”.
“Kalau dibatalkah nurut saran kabah itu jadi aku kawan. Anye aku lah telanjur janji kah nikah jande itu, maluan kalau batal. Atau supaye janji aku dide meleset kabah saje ye gantikah,” sebut Merin santai.
Nganing kicik Merin Pak Beluk tumdatum jantungnye. Sebab die ribang, anye takut balak besak. Tapi ngelepaskah was – was kenan ngicik “Lukmane carenye kawan, aku galak saje. Anye lukmane dengan ndung Yung”.
“Gampang ce, tinggal sampaikah saje. Bahwa kabah nggantikah aku nikah, sebab aku batal,” sahut Merin luk adak.
“Cacam, ndalak mati. Lah keruan kabah sipat ndung Yung. Dide jadi ce, nikahlah kabah saje,” kate Pak Beluk panik.