PAK Beluk purik, kenan lah beulang kali ingatkah Ujang Kericup, Taun dan Merin. Kalu dinjuk kerje jangan asal galak saje, kerjekah dengan sesuai petunjuk. Anye kantin Pak Beluk ini dide mehatikah ape ye disampaikah. Raban tu ye penting kerje dilakukah, udim. Urusan pegawian iluk ape dide, ndaik pernah dipikirkah. Semingge waktu bekumpul Pak Beluk nganar nian. Keluagh gale kate kebun binatang tu.
“Lah aku sampaikah, kerje itu sesuai aturan kawan. Ukan asal udim, maluan dikit dengan tubuh,” kate Pak Beluk.
Njawab Merin “Kabahkan hanye ngelaksanekah tugas juge ce, kan tugas nyampaikah udim. Jadi dide perlu kabah purikah hasil kerje kami”.
Ditambah Ujang Kericup “Kite ini bekawan bapang Yung. Jadi kalau kerje kami dide sesuai dengan kehendak ye diperintahkah harap maklum saje. Sebab udim kerje kite tetap bekantin”.
Lame mendam Pak Beluk nganing kicik kantinnye, udim tu kenan njawab “Inilah mbuat aku purik tu. Kamu gegaleni dide pernah kerje dengan tulus. Ye kamu – kamu pikir kerje udim dapat duit. Hasil kerje ndak iluk atau dide mnasa bodoh saje. Perlu diingat ce, beghuk ye diajakah milin niugh sekali tahu sampai die matik dide lupe, kalau kite masih terus salah di kesalahan same. Berarti kite kalah pitar dengan beghuk. Mase kite jeme ye itulah dijijih terus salah, ape die namenye itu. Kalau tentang bekantin itu benagh ape ye kekamu sampaikah. Anye kite ini bekerje secara profisional bai”.
Timbal Taun “Itukah dalam teori ce, kabah harus maklumi saje. Kite tetap kantin lepas njak kerje, tapi semestinye kabah harus banyak maklum”.
“Naaa kabah ai, lah besak palak tu namenye. Dalam hasil bekerje ukan ngandalkah kantin, harus ngancakah kemampuan. Kalau lah model ini kah rusak gale care bekerje,” kicik Pak Beluk purik.
Nganing Pak Beluk ngicik mbak itu Taun langsung ngecak palaknye. Udim tu kenan ngicik “Bebenagh bapang Yung, dide oii besak palak aku. Masih model itulah, dide ade berubah walau kerje dengan kabah”.*