Pak Beluk dengan Merin nekat masuk undangan, sambil bawe amplop kosong. Tian bedue ini tepakse, karena lah hampir sehari dide makan. Posisi duit tinggal 500 rupiah agi, beras habis, kupi sian kate.
"Sisa duit kite ini hane 500 rupiah agi, endai malam tadi kite sampai ke jam 9 hayu ini belum makan. Endai pade mag kite kambuh, kite masuk undangan di hujung situ saje, luk mane," ajak Pak Beluk.
"Ai seriuslah kudai, tuape kite masukah ke badah amplop itu ce. Kah maluannye kite kalu dide bebawean," jawab Merin.
"Duit 500 rupiah itu beli amplop, dapat 2 yang harga 250 pirak, amplop warna warni itu na yang model lem nasi itu," jawab Pak Beluk.
"Ai awu nian ce, melah kite gasak," jawab Merin.
Singkat cerita tian bedue inilah masuk undangan. Gaya tian due uni ceki uluk jeme dapat undangan, pakai baju kemeja, seluar dasar sepatu pentopel, tapi amplop kosong. Jam 12.11 MC dipucuk panggunglah ngajungkah tamu undangan ini makan.
"Untuk tamu undangan endang kudai balik, kite makan kudai. Jalur kanan arah panggung silahkan ngambik nasi gulainye di depan rumah tuan rumah. Nah untuk jalur kiri silahkan ngambik di samping rumah itu," kate Mc gegaik.
"Ai kite ini jalur kanan berarti ce, biarlah agak lambat saje kite biar dide nampak ige kite ini tamu undangan ilegal," kate Merin
"Aseli, aku ni bawe asoy kalu endak bawe balik kelak," balas Pak Beluk.
Singkat cerite akhirnya makanlah tian bedue ini, Pak Beluk dengan Merin ini de agi nuannye agi bayaklah gulai endai nasi.
"Ambik-ambiklah ce, jeme disini dide ade yang kenal dengan kite ini," kate Pak Beluk sambil nyiduk gulai.
"Ai kalu viral kite kele, di depan itu ade jeme videokan kite ini," balas Merin.
"Mampuslah, penting busung kenyang kudai," jawab Pak Beluk. *