PAK Beluk kini dang dapat mainan baru. Motor L2 Super warisan bapang ye hampir dijual nga mamang rongsokan, kini lah selesai direstorasi. Kini dirinye kenyenyat mbatak motor ye penuh kenangan itu.
"Yak motor peninggalan Wak dulu ini ce. Lah udem direstorasi eh," tanye Merin waktu betemu Pak Beluk.
"Yak awu ce. Menghidupkan kembali kenangan indah waktu gaek masih beduduk nga waktu kite bujang dulu," kate Pak Beluk.
"Haha. Teghiat kaba waktu kite ngundu pas habis minyak waktu balik ngapeli Endung Yung," ujar Merin menanggapi.
"Hahaha. Awu ce. Tepeluh kuning kite ngundunye," jawab Pak Beluk.
"Mangke kemane motor King kabah Pak Beluk," Ujang Kericup menimpali.
"Ade di ghumah. Cume ku panaskah saje amu akap," jawab Pak Beluk.
"Dide nak dijual. Ade kance ku nyakagh," tanye Ujang.
"Ahh. Cecangkah kabah," tanggap Pak Beluk.
"Nah serius aku tu. Letaklah hargenye. Nak 10, 12, ape 15. Kele ku sampaikan," kate Ujang.
"Aii udelah pule Jang. Dide pule ndak nenawar motor RX-King aku tu. Kele leghai agi belalang tempur tu," ujar Pak Beluk.
"Adak ngape pule pacak luk itu Bapang Yung," Merin penasaran.
"Mpaini tu lah ade due kali jeme nawar motor aku tu. Ye pertame bantingkan Yung Pantit, rusak. Kedue ngejim mesinnye," jelas Pak Beluk.
"Adak same luk burung motor kaba tu Pak Beluk. Amu lah tawar jeme, dide luput adak tu mati," kate Ujang.
"Awu ce. Pantang ditawar motor tu. Langsung merajuk," tandas Pak Beluk.