KEMAGHI Pak Beluk ribut besak ngan bininye Ndung Yung. Due belaki bini ini becekil gegare Pak Beluk maju ndak pegi mancing.
Anye bukan karne mancing tu ye di ributkan Ndung Yung. Tapi, Ndung Yung tedengar kalu mancing tu kini pacak pakai PL (Pemandu Lagu).
"Tape die ndak kamu jagal mangke ndak mancing manjang ni Bapang Yung," uji Ndung Yung.
"Adak mangke bulih ikan Ndung Yung. Tape agi pule," timbal Pak Beluk.
"Kalu bebaye Bapang Yung. Itulah sangkan aku ingatkah," Ndung Yung ngiciki lakinye.
"Adak ngape pule bebaye. Baseka bada mancing tu alap, ade pelindapan die pule," Pak Beluk nggub ngalah.
"Ude kendak kamu lah mun luk itu," timbal Ndung Yung ringam.
Ngape pule sebelum berangkat mancing ni Pak Beluk pegi ke Wc kudai. Anye Handphone (Hp) di tinggalkannye di meja pasigh Ndung Yung duduk.
Lum tu ade jeme nelpon. Tanpa pikir panjang langsung diangkatnye ngan Ndung Yung telpon tu.
"Lasung dide Bapang Yung. Aku lah mesan PL due sughang tadi," kate jeme nelpon tu. Udim itu langsung mati telpon tu.
Ndengar kate kance Pak Beluk ngicik luk itu. Ndung Yung langsung ngangat. Awak padahal, maksud kance Pak Beluk tadi PL tu pelet ikan. Sementare pemikiran Ndung Yung PL tu pemandu lagu alias artis.
"Ui Bapang Yung mandak kelah kamu amun keluk itulah kerje kamu ndak mancing-mancing tu. Amun lah tue tu mare nue. Jangan banyak ige ulah," Ndung Yung marah-marah sambil nguntalka ranggian pancing Pak Beluk ke belakang rumah.
Ndengar bininya tegauk-gauk marah, Pak Beluk dide berani agi ngeluar njak Wc.
"Ai bebayau ini, lukak ribut besak nian gawih ni. Tapelah salah aku ni tadi awah," pikir Pak Beluk di dalam Wc tu.