Pak Beluk nga Mak Beluk dang duduk di berende ghumah. Sambil nginak'i cuaca mpai ujan, jeme laki bini ni bebahas ape lokak ye untuk ngasilkah duit.
Karne kini dide pacak maksimal pegi ke talang karne dang musim penghujan. Sedangkan apak Beluk masih lame gajian perangkat desa.
"Tape kekire batan duit ni, Endung Yung. Litak ini tesakit kerungkungan gegera ngisapi rokok Malabro ni," keluh Pak Beluk.
"Adak tuape kah ndik lokak tu Bapang Yung. Keruan diwek kini musim penghujan mangke kamu gi lame gajian. Berhemat tulah agi jalannye," kate ndung Yung.
Pak Beluk lalu mandang sekeliling. Die lalu dapat ide, "Ade lokaknye, Endung Yung. Kite jualkah buah rambutan tanaman nining ni. Penganing ku bang bedebis juge hargenye".
"Berape pule rege buah rambutan tu kini Bapang Yung," tanye bini Pak Beluk.
"10 ribu sekilo amu nga tukang buah. Kite bom saje 8 ribu sekilo pasti laris manis," jelas Pak Beluk.
"Ude lasung amu luk itu," kate Mak Beluk.
Singkat cerite, akap paginye Pak Beluk nga bininye betatur njuluk'i buah rambutan tanaman nining dikale. Setelahnye, rombongan due tu siap-siap pegi ke pusat kecamatan untuk bejualan.
"Lukmane amu dide laku rambutan kite ni kele Bapang Yung," kate ndung Yung sebelum berangkat.
"Ude yakinlah. Pasti laku jualan kite ni. Tuhan tu dide tidok. Mangke alangkah jahat tuhan amu dide laku mpuk sekilo rambutan kite ni," nasehat Pak Beluk nga bininye.