Petang kemaghi Yung Pantit anak Pak Beluk maju nangis bebisut pinggir jalan di dusunye tu. Die ni nangisi tancinye Rp 5.000 lengit.
Anye, ndik lame tu, Yung Pantit tu betemu ngan Lihin kance bapangnye. Karne nginak anak kancenye nangis, berentilah Lihin sambil betanye.
"Ui Yung, ngape kaba nangis bebisut ni?" tanye Lihin.
"Tanci aku lime ribu pengejuk bak akap tadi lengit mang," timbal Yung Pantit, sambil maju bebisut nangis.
"Ui awu. Ini nah aku ganti lime ribu pule. Anye udim jangan agi nangis au," kate Lihin mbujuk anak kancenye tu.
Anye bukannye diam, Yung Pantit tambah tegauk-gauk nangis. Karne curiga, ditanyeinye agilah ngan Lihin ni.
"Adak ngape agi kaba nangis ni Yung? Kan lah mamang ganti tanci kaba ye lengit tadi," tanye Lihin.
"Tambah rugi nian aku amun luk ini mang. Cubelah amun ndik lengit tanci aku ye lime ribu tadi. Kan jadi 10 ribu tanci aku mbak ini," Yung njelaskah sambil nangis terus.
"Yak entah nian pule amun luk itu Yung. Udim melah aku antat balik saje kaba ni. Kite tanyekan ngan bapang kaba, ngape sangkan lengit tanci kaba tadi," kate Lihin.
"Anak Pak Beluk nian kaba ni Yung. Sebab, same nian tingkah kaba ngan Pak Beluk ye maju ndak untung tulah," tambah Lihin sambil mbatak motor. (roh)