Lum lame ni Pak Beluk dengan Marin berayak ke badah kawan ye ade di daerah pendusunan kabupaten tetangga.
Pas sampai situ, die bedue ni merase kagum nian dengan adiak sanak ye di sane ramah gale.
"Cacam, tape kabar pak. Ku inak tambah gagah saje kamu ni mbak ini," kate jeme tue dusun melami Pak Beluk.
Kebetulan Pak Beluk nyetel pakai kemeja masuk dalam, pakai sepatu kulit, ditanbah sigaran licin.
"Kabar baik, kamu tape kabar mang," timbal Pak Beluk.
"Ai kerih nian amun kami ni pak, maklum jauh njak kota jadi lupe ngan jeme ndak mbangun dusun kami ni," jeme tue dusun mulai bekeluh kesah.
"Belum agi besinyal adak, peregan hasil pertanian turun gale," tambah jeme tue dusun.
"Jadi, tulung nian pak, kalu kamu sedang sidang di DI-PI-IR tulung pikirka nasib kami di dusun ni," uji jeme tue dusun.
Pak Beluk ngan Merin tekejut bukan main ndengar jeme dusun ye nyangke Pak Beluk Anggota DPR.
Amun Pak Beluk lah ase terbang nian dikicikka anggota dewan. Anye, amun Merin rengam karne ndik sesuai fakta.
"Kudai kalu salah jeme kamu ni mang. Amun kance ku ni bukane anggota dewan. Beaghi-aghi kulu kiligh ndik keruan acung tula bele ini. Dewan njak mane. Dayinye saje lah nunjukka jeme buntu," kate Merin njelaska.
"Adak salah jeme bearti aku ni tadi. Maaf amun luk itu," kate jeme tue dusun tu sambil tetawe kecik.
"Hahahaha, lah salah peghasean Pak Beluk peci kamu tadi mang," kate Merin.
"Hahahaha itulah jiku," timbal jeme tue dusun.
Amun Pak Beluk tinggal mendam sambil nyengir-nyengir kecik.