PAS malam minggu kemaghi Pak Beluk ngan Merin ngikut lomba main domino di rumah jeme bekagukan. Selame proses main domino tu, maju becekil die bedue ni.
"Ui Bapang Yung, luk ape, pacak main dide kamu ni. Ngape dienjuk jalan terus lawan tu," kate Merin mulai marah.
"Yak, kalu kaba tula ye dide pacak main. Amun aku ni lah sedap ngecakka hadiah main dom nila," timbal Pak Beluk pede nian.
"Nah mun luk itu, jangan agi di ajung jeme tu ngedum saje. Baghih sampai mbak ini masih kosong ndak kite," timbal Merin rengam.
Anye, sampai pertandingan udim die bedue ni masih kalah tulah. Cak sekali dide dapat jatah ngedum.
"Nah kan ujiku tadi. Lah ku tebak nian pasti kalah tulah kite. Luk padek nian ngicik lah banyak dapat hadiah," kate Merin semamam.
"Udimlah, mungkin kite malam ni sedang lum beruntung. Jadi dide pule ndak pening ige palak," timbal Pak Beluk luk adak.
"Pacak ngicik tulah kaba tu Bapang Yung. Besak uap saje ini, awak aku selire nian ngan hadiah tu tadi. Nyesal pule aku bekawan ngan kaba ni tadi," Merin maju bemumut.
"Wui bajang, amun kaba terti nian dide kah kalah kite ni tadi. Amun jeme terti tu pasti pacak nebak buah kawannye. Buyan kaba ni. Udim melah kite balik," kate Pak Beluk.
"Ai mate lah ghungau, main dum masih kalah," sesal Merin maju semamam. (roh)