Beragam Tue

Pertanyean Ndung Yung ni langsung nyinggung Pak Bekuk. Sebab, semenjak nikah Pak Beluk dide pernah perhatian nian agi dengan bininye.

"Ui Bapang Yung, perasean aku pas kite masih nyanting dulu, kamu ni luk kepadek nian galak nian ngejuki aku hadiah. Anye ngape pas kite lah nikah ni dide perna agi kamu ndak ngejuk hadiah ngan aku," Ndung Yung mulai ngicik.

"Nah itulah kamu tu salah nian. Kalu perasean kamu saje titu. Awak rajin aku enjuki kamu hadiah," timbal Pak Beluk sambil maju niupi kopi angat.

"Ai kate kamu saje titu. Setahu aku dide perna agi kamu ngejuki hadiah ataupun kejutan ngan aku. Kamu ni mbak ini dide nian ade agi perhatian ngan bini," Ndung Yung nampak serius nian.

"Ui sayangku, cube kamu kinaki nelayan tu, ade dide nelayan ngejuki ikan umpan amun ikannye tu lah udim ditangkap," kate Pak Beluk sambil manggil sayang dengan bininye takut tersinggung. Sebab kenan hanye beragam saje.

"Ai entah keruan adak ngan aku. Anye tape kendak kamulah," timbal Ndung Yung sambil masuk kedalam ninggalkan Pak Beluk sorang di luar.

Singkat cerite, pas malamnye, waktu Pak Beluk ndak tiduk. Duare kamar lah tekunci njak dalam. Lah takut nian Pak Beluk, sebab bini kenan pasti marah gawih kicikkan die udim makan tadi.

"Ui Ndung Yung, ngape duare ni dikuncikah ni. Aku ni ndak tiduk," kate Pak Beluk sambil degur-degur ngetuk duare kamar.

"Ngape Bapang Yung. Cube kamu kinak kudai nelayan tu, ade dide ye tiduk dengan ikan," timbal Ndung Yung njak dalam kamar.

"Yak aku tadi beragam saje sayang. Jangan pule kamu ambik ati nian," Pak Beluk maju merayu bininye.

"Udelah Bapang Yung, tiduklah ngan ikan tulah kamu. Aku dide selire jeme galak ige beragam tue tu," jawab Ndung Yung.

"Ai rusak nian ini. Lukak kedinginan malam ni awak aghi ujan mangke tiduk surang depan tv gawih ni. Gegara nelayan gale tini. Nasip-nasip," Pak Beluk begumam dalam ati. (roh)