Kupi Idar

MERIN tiap petang mehatikah Pak Beluk pegi kerje, sebab selalu mbatak botol besak. Setiap kali Merin nawari Pak Beluk kupi, kenan dide galak. Merin dide keruan alasannye dide galak, tapi udim die mbuat kupi dikinaknye Pak Beluk ngupi. Dalam ati Merin, motol alap itu kupi Pak Beluk kirenya.

Waktu jeme due itu udim kerje, sambil ngudut Pak Beluk nuangkah kupi njak dalam botol alapnye ke gelas. Di situlah Merin keruan nian kupi ye di dalam botol Pak Beluk.

“Sesuai kabah aku tawari masakah kupi dide galak ce, kabah mbatak kupi njak ghumah,” kicik Merin.

Sambil lelinyum Pak Beluk njawab “Au ce, dibuatkah jeme ghumah setiap pegi kerje. Jadi madak pule nulak, kele dikatenya ade ape – ape”.

“Au nian ce, bini kite ini tekadang peghasean ige. Kekadang musingkah pale, urusan kecik dibebesakah,” sahut Merin seadenye.

Sambung Merin “Ngengumung kupi tape pule, nampaknye beda dengan kupi kite di kantor ini. Agak belagak warnanye, model JP nian”.

“Pastilah, kupi buatan jeme ghumah belagak. Jadi kupinye belagak pule, ditambah memang bahannye alap. Kabah galak ncukah, pasti ketagihan kele,” kate Pak Beluk sambil nuangkah kupinye ke gelas Merin.

Merin hanya tepenam saje, udim dituang Pak Beluk. Merin langsung minum, waktu itulah Pak Beluk ngicik “Alapkan, kupi olahan alap itu. Asalnye kopi njak Jambi itu, tukang jualnye belagak nian ce”.

“Oooo pantas nian,” sahut Merin cepat.

Pak Beluk lelinyum, tapi kenan penasaran. Betanye kenan “Pantas ape ce”.

“Pantas lah dingin, sebab kupi ini lah idar bejalannye,” sahut Merin santai.