WC Canggih

Jadi ceritenye Pak Beluk ngan Merin ni lah jauh hari bejanji nonton konser. Paslah hari H nye nambah due personel agi, jadi jeme empat rombongan ni ndak nonton konser.

Lah tekumpul gale rombongan ni tadi langsung lah berangkat. Pukuknye ndik kecinean agi, ndik ngulur gas. 

Pak Beluk ngan Merin ni pas saje segoncengan. Lah lame juge di jalan, Pak Beluk ni lah kepegalan gale. Kehit gale ame katenye luk jeme tue idapan sesakit. Keting sakit pinggang sakit.

"Rin pegal gale jak pinggang ni sampai ujung keting, kebile sampai ni?" tanye Pak Beluk.

"Same saje kite tu Mang, gehit gale tini," jawab Merin.

Singkat cerite, lah di pertengahan jalan ujan pule.

"Nduk ayy, malang pule nasib gara-gara ndak nonton konser Ada Band keujanan luk ini," Pak Beluk ngicik.

Beguyurlah rombongan ni tadi sambil nempur ujan. Lum lame sampai ke badah penginapan.

Pai nembai sampai lah ndak pengeluaran Pak Beluk ni tadi alias buang air besar (BAB). Lum lame ke WC lah Pak Beluk ni tadi. Sate masuk WC duduk gale.

"Yak Merin sini kuday," Pak Beluk lah kebingungan.

"Luk mane carenye tini ame bende luk ini, ke mane cangkung kemane bebasuh ame luk ini Merin?" Pak Beluk lah kebingungan.

"Ape ndik pakai cangkung, ape tegak ape lukmane tini?" lanjut Pak Beluk.

"Mamang tu duduk situ ame lah udim pecitkah di pucuk ni, udim bebasuh makai sower ni makmane katrok benagh Mang," jawab Merin.

"Bebenagh dikit Merin mase luk ini, kumuh ige anye urungkah saje ame luk ini deterti aku," Pak Beluk ngicik.