Salah Beli

NDENGAR harge deghian ni murah, Pak Beluk dengan Merin ni berencane ndak beli deghian di lapak jeme jualan deghian. 

"Malah jam beghape kite beli deghian ni," tanye Pak Beluk.

"Uy secepatnye tambak iluk kalu aku," jawab Merin.

"Jadi kalau mbak itu," sahut Pak Beluk.

Singkat cerite Pak Beluk dengan Merin ni lah sampai di jalan jeme jualan deghian. Karne banyak yang jualan, Pak Beluk dengan Merin jadi bingung.

"Nduk banyak nian pule yang jual deghian ni au ce," ucap Merin.

"Yak au, cube kite cari yang di ujung tu, masih banyak di ujung tu iluk," ajak Pak Beluk.

"Melah," jawab Merin setuju.

Lah lame Pak Beluk dengan Merin mondar-mandir sambil nanyekah harge deghian, tapi masih belum cocok juge, Pak Beluk dengan Merin ni nyari yang murah dengan yang besak.

"Ay lah payahan aku tini ce, ndik cocok-cocok harge deghian ni," kate Merin ngeluh.

"Aku ni juge, malah kite beli inilah mangke kite balik, jauh motor kite ni tadi teparkir," jawab Pak Beluk.

Setelah deghian tebeli, ternyate di damping parkir motor ni tadi ade bapak-bapak yang nawarkah deghian murah dan besak.

"Nduk lah jauh-jauh kite ke ujung, disini ade ye lebih murah dan besak," kate Pak Beluk ngeluh.

"Kaba yang ndak benagh ke ujung tadi, akhirnye salah pilih kite ni, mane kecik mahal pule, udimlah lah tebeli mehal malah kite balik," ajak Merin.(fps)