Salah Gale

UDIM mandi petang kemaghi, Yung Pantit anak Pak Beluk belajar bahasa Inggris ngan Ndungnye. Anye kenan nanggung kene marah gawih pertanyaan Yung tulah.

"Mak, bahasa Inggris what itu artinye ape?," tanye Yung.

"Awu, nyelah ape Yung," timbal Ndungnye singkat.

"Nyelah ape mak. Aku kan betanye what tu tape retinya," Yung ngulang betanye.

"Awu, nyelahlah, artinye tu ape," kate Ndung Yung njawab agi.

"Iyak entah nian pule bai, jeme betanye kamu betanye pule mak. Luk ape ndak terti aku ni," timbal Yung mulai rengam.

"Woi Yung aku ni dide betanye ngan kaba. Aku tu njawab pertanyean kaba tula. Kateku, what tu artinye ape," Ndung Yung marah pule.

"Nah mangke tape dide retinye mak," Yung tambah bingung.

"Laillahai Yung Pantit. Baseka arti what dalam bahasa Indonesia adalah apa, kalu kate kite nyelah ape. Luk mane kaba ni Yung. Same nian ngan perembak bapang kamu kaba ni. Belajagh lah saje ngan Bapang kamu Yung. Bene aku ngan kaba ni," Ndung Yung tambah rengam ngan anaknye tu.

"Ui awu mak, udim amun luk itu dide ndak marah nian. Amun ndik keruan udim. Salah gale ye aku sampaikan," timbal Yung masih kilah nyalahkan ndungnye.

"Ai entah Yung, enduk aiii, aseka ngape aku Yung ai. Kendak kabalah. Bapang Yung, sanekah kudai anak kamu ni," kate Ndung Yung tegauk-gauk manggil Pak Beluk. (roh)