Salah Pak Beluk

Belum lame ini Pak Beluk aqiqahkan Yung Pantit. Bukan main raminye jeme datang. Anye nye datang de ade lanang, Kerbai gale ye datang. 

“Merin, ngape aqiqah Yung Pantit mpaini datangnye Kerbai gale,” uji Pak Beluk.

“Ngape pacak iluak itu Pak Beluk. Itulah kukinak ngape Kerbai gale datang de ade lanangnye. Cuma aku nilah dengan mu yang ade,” timbal Merin.

“Bingung aku Merin, padahal lah aku undang gale kance banyak ni, sampai kance jak keciak lah aku ajak juge ke rumah ku,” uji Pak Beluk agi

“Apelah salah mu Pak Beluk, mangke jeme di dunie angat ni de ndak ke rumah mu. Padahal makan gulai kambing,” timbal Merin agi.

“Ntalah Merin de ndak jeme ke rumah aku, padahal gulai kambing nyembelih empat ikuak pakai sop pule lemak nihan makannye,” uji Pak Beluk agi.

“Kalu mu de pernah datang amen diundang acara di umah jeme banyakni,” timbal Merin

“Au nian Merin, de pernah ku datang, anye ndung Yung Pantit tulah aku ajungkan. Paling di amplop name aku tepapar besak,” jawab Pak Beluk.

“Nah, itu lah salahmu Pak Beluk, jeme ni malas amen kite de datang, ade yang ngapal pule sape de pernah datang. Jadi wajar nye datang Kerbai gale mbalas ndung Yung Pantit tu,” jawab Merin. 

“Ai cacam, nyelah nian katemu Merin, aku de pernah datang amen diundang. Wajar saje ye datang Kerbai gale aqiqah ni tadi. Jak masang tenda terpal sampai susun kursi Kerbai gale,” uji Pak Beluk.

“De ngape pule Pak Beluk yang datang Kerbai gale, mangke lemak goyang senggol amen ade musiknye,” timbal Merin sambil bedehem.