Malam kemaghi Pak Beluk bene karne kuota internet di Handphone (Hp) nye lah habis.
Jadi karne dide pacak agi ngirim Whatsapp (Wa) ape agi buka internet, Pak Beluk langsung inisiatif tandang ngan kancenye Ujang Kericup.
Singkat cerite, pas sampai rumah Ujang, kenan langsung betanye pasword wifi nye.
"Anu, langsung saje tini ce, tape die sandi (pasword, red) wifi di rumah kamu ni?" tanye Pak Beluk.
"Dasar miskin," timbal Ujang luk adak.
"Tape kate kaba!?" uji Pak Beluk.
"Dasar miskin!" kate Ujang ye agak bias ngicik.
"Tape maksud kaba Ujang," Pak Beluk langsung betegak sambil bemuke marah.
"Ya dide bedie maksud tetape, kaba tadi kan betanye tape sandi wifi, nyelah itu (dasar miskin) tu," Ujang njelaskah.
"Ui luk itu, sangke ku kaba madakkah aku tadi," timbal Pak Beluk langsung duduk agi.
"Itulah, jangan murah ige nyimpul baseka kerje tu. Ade tinggal mapap ndik keruan acung," Ujang ngiciki Pak Beluk.
"Harap maklum ce, sedang musim buntu ni langsung angat dade ndengar sandi wifi kaba tadi," sintung Pak Beluk.
"Ude masuk kela sandinye tu, banyak ige gawih kaba Bapang Yung," kate Ujang.
"Awu namenye," timbal Pak Beluk.
"Udim tu dide ndak marah bai empuk dikicika miskin. Basekah jeme ye numpang wifi tu lah cengki sedang ndik bedie kuota internet. Nah, wajar saje amun dikicika luk itu, segarian ngan miskin soalnye," Ujang luk adak ngicik sambil senyum kecik.