LAH berape aghi ni ndung Yung bini Pak Beluk maju curiga dengan nomor Handphone (Hp) ye ade di Hp lakinye.
Sebab, tiap di cek di daftar panggilan nomor ye bename Mak Lampir tu maju nelponi Pak Beluk tiap aghi.
Karne penasaran dan takut nomor tu selingkuh lakinye, ndung Yung betanyelah ngan Pak Beluk.
"Aku ndak betanye kudai ngan kamu bapang Yung," kate Ndung Yung mulai ngicik.
"Betanye tape pule, luk serius nian nampaknye," timbal Pak Beluk.
"Aku lah mulai curiga basekah kamu ni lah selingkuh njak aku," ndung Yung mulai ngabangka dayi.
"Yak, ngengape kamu NI Ndung Yung. Ngape idar nian pertanyean ni," Pak Beluk bingung.
"Odimlah kudai kamu banyak ige alasan. Cube jelaskan kudai nomor sape ye bename Mak Lampir di Hp kamu tu," tanye ndung Yung serius.
"Oh itu, sangke ku tape nian tad," jawab Pak Beluk kelelenyum.
"Mangke nomor sape titu, ngape kamu kelelenyum luk padek nian," ndung Yung tambah ngangat.
"Ui ngape bucu kamu ni. Nomor kamu tula baseka titu," kate Pak Beluk.
"Mangke ngape kaba mbuat nomor aku luk itu," uji ndung Yung agi.
"Kan ukan itu masalahnye. Ye kamu tanye tadi laki selingkuh ape dide. Nah ini kan lah tebukti aku ndik selingkuh. Itu kan nomor kamu tula," Pak Beluk njelaska panjang libagh.
"Ui awu nian pule. Udim gila amun luk itu. Sangke ku kamu selingkuh tadi, aku lah curiga," kate ndung Yung sambil balik ke dalam agi.