Lum lame ni Pak Beluk ngah Merin mancing di tebat nining kari. Entah agi apesnye atau ape masalahnye, lah hamper setengah aghi, lum ade ghulih.
Adelah ikan nila kecik, sebesak 2 jari. Pak Beluk dapat 2 ekok, Merik sikuk.
“Ai lukmane tini?” uji Merin, mulai ndik sabar.
“Ndak sabar ce,” jawab Pak Beluk, luk adak.
“Kak belikak petang aghi ni. Kapuh gi ghulih same ngah seluang bute,” Merin mulai kesal ngah Pak Beluk.
“Adak, mangke lukmane?” tanye Pak Beluk.
“Ui berencane ce. Pakai otak tu,” kate Merin sambil nekili rukuk.
“Ade carenye ce. Kami aghian tu banyak ghulih mancing di tengah,” kate Pak Beluk ngenjuk ide.
“Lambat ige ngecik, malah kite nengah,” ajak Merin.
“Malah, dululah dikit kaba nyebur. Pancing aku ni dang dijujutnye. Kinak pelampungnye timbul tenggelam saje jak tadi,” uji Pak Beluk.
Merin ni endik nganju agi. Nengah nian kenan. Celane ndik kenan lepasi, awak celane sirap ndik mbatak. Lah ndak setengah jam, Pak Beluk lum kinah nengah. Sughang Merin tengah tebat besak. Ikan lum juge ade makan pancing Merin. Malahan pancing Pak Beluk celicit dapat ikan, besak juge.
“Yak nengahlah Pak Beluk,” Merin tegaik.
“Kudai ce, pancing aku ni dang pengene benagh,” tangguh Pak Beluk.
“Ai…Gajulkah kaba ni. Celane aku lah basah. Lukak masuk angin aku ni. Mane mincing ndik ghuleh. Banyak penanggungan ni,” Merin bemumut.
“Sape pule ngajung kaba nengah. Aku tadi becerite saje,” Pak Beluk nimbal.