PAK BELUK lame nian tediam nginak bebujang sedang santai dengan kekantinnye sambil main Hp kapuh. Raban tu juge asyik dengan gegadis ye sejak tadi ikut nongkrong. Lamunan Pak Beluk ini tehentik ketike die dikejutkah Merin, bahkan kenan sempat tegagau.
“Iluk – iluk ce, kalau aku jantungan matik gegare dikejutkah. Lemak di kabah dide lemak di aku kalau itu tejadi,” kate Pak Beluk ringam.
Timbal Merin “ Aku keruan kabah dide bidapan jantung, jadi aman saje kalau dikejutkah. Aku sejak tadi ngkinaki kabah ce, mate kabah neman nian nginak bebujang dengan gegadis tu. Ade ape kawan”.
“Dide, sedang tekinak saje,” kilah Pak Beluk.
Sambi tetawe kecik Merin ngicik “Keruan aku tipe kabah tu ce, kite ini sekatin sejak kecik. Ade ape sebanghnye kawan, ape yang membuat ganjalan hati kabah”.
Sambil lelinyum kecik Pak Beluk nerangkah “Aku tebayang, alangkah lemak bebujang tu ce. Lah bepakakian ilu – iluk, begaya. Pakai motor dan nongkrong pakai Hp alap nian. Aku tebayang kite masih bujang dulu, sare. Jangankah pakai motor, tekadang selup sege. Pakaian untuk bekusik gadis kekadang sepinjaman dengan kabah, supaye ade warna baru dikinak gegadisan”.
“Itu namenye kisah mase lalu, jangan nian dirupuki ce. Jadi dalam pikiran kabah tadi mbak mane pule,” sahut Merin serius.
“Dalam hati dengan pikiran aku, seandainya aku pacak semude raban tu lah ceki bakal kalah besaing gale raban tu. Aku bakal ye paling cete di rombongan tu, ape agi lah pakai motor, HP alap dan tampil begaya,” sahut Pak Beluk PD nian.
“Cacam, kabah minjak kudai. Kabah ini lah tetiduk tapi mate tebukak oii. Sadar kawan, jangan banyak ngayal,” tegas Merin sambil tetawe bias.
“Oii jangan mbak itu nian, itukan aku pakaii perumpaan ce. Jadi kabah harus akui kudai ape ye aku sampaikah tadi,” tegas Pak Beluk agak dimak.
“Dide, udimlah ce. Jangan nagyal, kabah tu banyak angan – angan. Kabah tu cepat ige lahir, semestinya lahir mbak ini. Tapi dide pacak diurungkah, sebab duaghe badah kite ngeluagh dulu lah digik agi, lah matik jemenye,” sahut Merin tetawe panjang.