MERIN lintak nian antak ke lebaran ini, badan lah telitak nian. Ditambah agi kebutuhan antak ke lebaran ini ruaaar biase besaknye.
Njak kah masak juadah, sampai ke beli baju baru anak – anak mbuat belanje tetekan habis. Sementare untuk bekerje kenan ndik sanggup, sebab badan litak.
Sedang merenung Merin kedatangan tamu agung, Pak Beluk. Nginak Pak Beluk datang, Merin agak purik. Sebab didekah nyelesaikan masalah kenan ini kele, paling mbuat runyam saje. Tapi Merin dide pacak ngilak, sebab lah depan daghinye.
“Tape lamunan kawan, jangan dipusingkah reraye ni. Hanye seaghi due reraye tu, jadi ndang jadi beban nian,” kate Pak Beluk mulai bejijih sambil narikah kurdi untuk duduknye.
Walau agak malasa njawab,tapi merin masih nimbal “Dide pule kah dipusingkan nian. Anye kepikiran, sebab kite ini bermasyarakat. Barang mustahil kite didebejuadah, anak dide besiuk dikit. Nampak nian kite jeme kerih, jadi anak – anak harus riang waktu lebaran”.
“Au nian pule, tapi mbak mane kalau sedang dide beuit ce. Aku dide nian jadi tekanan batin urusan lebaran ini,” kate Pak Beluk PD.
“Oiiii kabah, aku ini dide semegi dengan kabah. Kalau kabah bini sutik anak sutik, jadi beban kabah dide semegi dengan aku. Aku anak empat, bini sutik. Jadi jumlahnya lah lime,” kate Merin agak pedas.
Nginak kantinye lah agak manas, Pak Beluk mulai ngicik agi “ Aku datang ke ghumah kabah ini kah ngenjuk lukek cete. Ade gawian ye dikerjekah, aku yakin kabah pacak”.
Nganing ade lukan Merin mulai mutarkah badah duduk, kenan langsung betanye “Tape die luka tu ce, aku jadi nian. Asal naikah duit, tapi jangan bejemur kerje tu. Sebab litak puase bekerje di badah model itu. Aku puase, madak lah kah penghujung bulan dide puase”.
“Naa itu die, aku ngajak kabah mbuat pagar hume dengan dangau. Pasti udimnye paling lambat antakah puase bungsu. Kalau kabah lah ngicik litak, aku nggup ngajak kabah. Aku ini merlukah tenage untuk kerje tu,” tegas Pak Beluk.
“Aiii lukmane tue itu, lukmane care ngatasi lemak de litak nian itu bai. Udim tu lah pacak bonkan,,” kate Merin mulai gelisah.
“Kalau bon lah pacak, aku lah mbatakah duit Rp 500.000 untuk bon kabah. Kalau ngatasi litak puase gampang ce, ade tipsnye,” kate Pak Beluk mulai ngeranyam.
“Serius lah mbatak duit kabah ce, lukmane pule ngatasi lemak dide litak puase tu waktu kerje,” tanye Pak Merin penasaran.
Sambil ngeluaghkah duit Pak Beluk bejijih “Kalau bon ini die duitnye, kalau tips supaye puase dide litak itu mudah nian. Waktu kite sedang lelitak nian itu, mulai kite pasang aksi,” kate Pak Beluk serius.
“Aksi model mane die bapang Yung,” tanye Merin penasaran.