Pak Beluk dengan Merin ini belawai ke air besak. Target lawaian tian ini, ikan pelus atau ikan sidat bahasa Indonesianye. Pak Beluk dengan Merin nyelam ke air nyalar lubang di bawah batu atau di batas tanah. Karena lubang di bebatuan atau tanah itu sarang ikan sidat.
Singkat ceritenye, Pak Beluk betungge lubang agak besak, pasangnyelah tautan di dalam lubang itu. Sekitar 10 taut tian lah radu tepasang ditunggulah sekitar 12 jam.
Sekitar jam 1 malam Pak Beluk dengan Merin ini lah ngawasi tautan. Tautan Pak Beluk yang dilubang pertame tadi rupenye dapat nian, tapi lah mati. Sementara tautan Merin same sekali de ade dapat. Karena tian due ini masih pemul dan empai pertame naut ikan sidat. Jadi lum tahu nian jenis ikan sidat luk mane, sepengetahuan tian liut radu.
Singkat ceritenye, tian ini balik riang liwatan karena dapat tautan tian. Endai jauh Ujang Kericup ini agak kemangahan nginak hasil ulihan tian due ini tadi.
"Uii ape kuti bawe itu?" tanye Ujang
"Sidat, mane mate mu pecah bola," kate Pak Beluk.
"Bangeeee kamu bedue ini, ayin pelus itu," kate Ujang Kericup.
"Ape kidahnye ular," gurau Merin
"Ae ular air itu," jawab Ujang Kericup.
"Ayin ular awan," kate Pak Beluk sambil bergurau.
"Serius, ular nian itu. Cube inak gundangnye itu, kalu pelus itu tipis, kalu ular itu bulat ujungnye," kate Ujang Kericup.
Ngerasi penasaran, nginaklah di YouTube tian due ini perbedaan sidat dengan ular air. Rupenye ape yang disampaikan Ujang Kericup ini betul.
"Astaghfirullah ular nian ini," kate Pak Beluk sambil gibatkan ulihanye ini tadi.*