MERIN terus saje bejijih dengan kekantinnye, kenan ngajak kekantin kuliah. Anye raban tu dide galak, ade ye alasan ekonomi dan dide sempat. Tapi ade juge bealasan untuk ape agi kuliah, badan lah tue. Urusan gelar kalau lah tue dide penting, sebab ukan pegawai negeri. Dide bakal ade ijazah sarjana untuk kenaikan pangkat atau persamaan.
“Aku dide mbuku agi kalau kuliah ce, ngabiskah belanje dan waktu saje. Kalau kabah itu urusan mu, tapi jangan pule ngajak kami,” kate Taun ke Merin serius.
Nimbal Ujang Kericup “Aku sepakat kate kabah Taun, sebab Merin ini ngajak kite ngikuti arus dide titu. Kalau kabah kah kuliah gaslah, kami dide ngalangi ce. Kami dide bedie gati ijazah itu, ncangkul sawah dengan merumputi kebun kawe dide perlu ijzah sarjana”.
Sahut Pak Beluk serius pasang udim “Oiii ce, utak kite ini lah lemot. Didekah medal nian kuliah tu, lukmane kite belajar masih nilai cukup ye didapat. Kalu lulus pasti itu, anye dengan utak dangkal kite ye lah tue ini kah besaing dengan jeme mude utak masih panas, didekah menang ce. Ditambah kite kuliah petang, sementare lawan kite tu kuliah njak akap sampai petang”.
“Betul itu Bapang Yung, sepakat nian kami kicik kabah itu. Merin ini cak padek nian, awak bange tepelalu waktu SMA dulu,” kate Taun cak adak.
Nganing kicik Taun dan kekantin lain itu Merin nyahut juge “Au kicik kabah rerami tu benagh gale, anye di dunie makin maju ni kite harus siap di segale bidang. Temasuk sekol tinggi, walau kite buyang bange, anye waktu untuk ngelamar gawian cukup syarat, S1”.
“Oooo, jadi kabah kah kuliah itu hanye sekedar syarat saje, ukan kah maju dalam bepikir. Dide mbuku kalau kuliah hanye syarat tu ce. Udelah bubar saje kite,” tegas Pak Beluk sambil kisit.*