Lum lame ni Pak Beluk ditawari jeme mbeli handphone (Hp). Kebetulan jeme yang nawarkan Hp tu betine alap.
Betine tu ngicik ngan Pak Beluk base Hp tu canggih dan pacak menuhi segale kekendakan. Cukup ngicik saje, langsung dituruti die gale kekendakan.
Singkat cerite, karne temakan ngan tawaran hp tu, ditambah agi Pak Beluk ndak cakicak padek didepan betine tu. Jadi, Pak Beluk langsung mbeli hp tu.
Pas balik ke rumah, Pak Beluk langsung pamer ngan bininye, Ndung Yung.
"Ndung Yung, aku tadi dapat hp rege murah, udim tu canggih pule hp ni. Pacak diajung tape kila," kate Pak Beluk sambil nunjukkan hp tu ngan bininye.
"Hp tape die pule Bapang Yung. Udim tu pacak di ajung lum mane pule," Ndung Yung penasaran.
"Entah dide keruan aku, anye kate jeme ye njual tadi cukup ngicik pasigh hp ni. Mangke kele langsung nimbal hp tu," Pak Beluk njelaskah.
"Ngicik luk ape titu," Ndung Yung mulai curiga.
Tanpa pikir panjang Pak Beluk langsung praktek. "Ok Google tolong buatkan aku kopi," kate Pak Beluk.
Anye Hp tu masih diam tulah. Karne takut lum kedengaran, Pak Beluk tambah bias ngicik "Hui Google buatkah kopi, kopi, kopi," Pak Beluk tegauk-gauk.
Udim itu, Hp Pak Beluk langsung bemuni "Maaf, coba ulangi lagi, dan lebih keras lagi suaranya,".
"Ai tuli pule hp ini," Pak Beluk rangam.
"Wai lah buyan nian base kamu ni Bapang Yung, base kamu tu lah kene tipu. Segale hp mbak ini aghi pacak gale dibuat luk itu. Base tembak itu namenye sisten Google," kate Ndung Yung panjang libagh.
"Ai bedah nian Ndung Yung, ndik percaye kamu tu," Pak Beluk masih lum ndak ngalah.
"Awak buyan cakicak pintar base kamu tu. Mane ade pule hp pacak diajung mbuat kopi kapuh. Amun tue tu nue, jangan banyak ige ulah. Begerak keting ngan tangan tu, pegi ke dapugh amun ndak mbuat kopi," kate Ndung Yung sambil larat.