CERITENYE Pak Beluk ngan Merin agi ngobrol di warung nasi goreng sambil scrolling-scrolling berita di internet.
"Rin! Kabah ni pasti dide tau kabar terbaru! Bupati cup nak mulai tanggal 5 Agustus, tim aku siap juare!" uji Pak Beluk.
"Apaw? Tim kabah? Main bal sajaw napas ngos-ngosan, ndangkan juare, jalan lurus sajaw mutar balik kabah Luk," uji Merin meremehkah.
"Ndang asak ngataukan aku! Tahun ni aku jadi strategi manager, dide main, cume tegak pinggir lapangan sambil ngecak pulpen ngah kertas!" jawab Pak Beluk.
"Hadiahnye sajaw besak, juare 1 lime belas jute, tapi ingat, ini ajang silaturrahmi, ayin ajang rusuh-merusuhi!" jawab Merin.
"Tenang, tim aku santun. Cume kadang, kitaw ngicikkan bole berat, lapangan licin, dan lawannye pakai dukun!" jawab Pak Beluk.
"Adaw-adaw sajaw kabah ni. Kabah tau dide Fogi Aliong tu mbakini jadi ketua PAN kaur?" tanye Merin.
"Tau! Titu yang masih mude tu, ngicik e tegas tu kan," jawab Pak Beluk.
"Awu, nyelah. Katenye nak bantu rakyat, kerje same Ngah anggota DPR RI, bantu program PIP. Bayak anak sekol dapat bantuan" jawab Merin.
" Halap nian, tapi kalu pacak aku jugaw dapat PIP... Program Istri Pintar... Pacak biniku dapat bantuan," juji Pak Beluk sambil tersenyum.
"Kabah ni dide adaw seriusnye. Tapi awu, Fogi tu ngicik nak besakkan PAN. Target 3 kursi di Pemilu. Kabah masuk PAN Luk!" Jawab Merin.
"Aku? Masuk PAN? Dide sempat, pen. Aku sibuk jadi suami partai independen. Partai Dide berani jawab telpon istri!" jawab Pak Beluk.
"Wkwkwkwkwk... Adaw-adaw sajaw, kabah dengar dide kabar PPPK? Yang lulus 467 orang, tapi NI-nye lum diajukan, nunggu verifikasi," tanye Merin.
"Awu. Kance aku lulus, tapi mbak ini gelisah nunggu SK. Kiciknye tiap hari mimpi surat SK terbang turun dari langit" jawab Pak Beluk.
"Wajarlah, prosesnye panjang. Tim Pemda agi nyocokan data, takutnye adaw yang ngaku honorer, padahal kerje nyuci motor!" jawab Merin.