PAS libur sekol kemaghi, Yung Pantit diajaki bapangnye Pak Beluk balik dusun ke rumah niningnye.
Singkate cerite, pas lah di dusun. Yung Pantit ngobrol mgan niningnye. Ndik lame tu, neneknye betanye dengan Yung.
"Ui cung, ngape aku nelpon pakai Whatsapp (Wa) ni maju menyambungkan terus tulisannye," tanye Nenek Yung.
"Yak kalu abis paketnye ning," timbal Yung.
"Yak baseka aku ni empai udim beli pulsa 50 ribu. Nide kengade lah abis langsung," uji Nenek Yung.
"Ui ning, baseka nelpon pakai Hp android tu bukanne pakai pulsa, tapi pakai data," Yung njelaskah.
"Yak bigal kaba ni, baseka Hp aku ni Samsung, bukan andorid," uji nining Yung agi.
"Ui awula, empuk nelpon pakai Hp samsung masih ndak pakai data tula ning," Yung maju njelaskah.
"Yak ngengape bai, mase ndak nelpon saje pakai ndak didata kudai nian," nining Yung tambah bingung.
"Lailah nek, bukan didata, anye data tu same ngan kuota (internet, red)," Yung mulai bene njelaskah die.
"Tadi didata, ini lah kuota. Alang ke segenye pule bai cung," nining Yung tambah bingung nian.
"Ai, udimlah eh nide kah ngerti kamu tu ning. Pokoknye amun ndak nelpon ndak pakai Hp android, ndak Hp Samsung harus pakai kuota," Yung mulai rengam.
"Yak ndak jeme kuota nian berati mangke pacak nelpon pakai android ni. Mangke amun jeme dusun luk kite ni nide ke pacak nelpon bearti cung eh," uji nining Yung.
"Ai entah ning, nide keruan aku. Kendak kamulah nek. Udelah pule lum pule ndak nelpon amun nide terti bai. Mbingungkah kalau njelakah jeme zaman radio ini," kate Yung rengam sambil pegi.