Pak Beluk bercerite dengan Merin base bibainye Mak Beluk. Lah hampir seminggu ini nyegut karena rencane libur ke pantai urung. Ngan masak hane geguringan terus.
"Ai, litak ige bani seminggu ini ce," keluh Pak Beluk.
"Naa litak luk mane itu, ame litak ngehasilkan lemak juge," jawab Merin.
"Radulah kalu luk itu, ini Mak Beluk hampir seminggu ini masak geguringan terus. Diajungkan masak santan de endaknye, pekare urung midur ke Pantai," kate Pak Beluk.
"Aii salah nihan kangau kalu uluk itu, bibai tu kalu endak ngajak midur ke pantai berarti agi suntuk batu. Ye ngape pule kaba dide ngajaki ke pantai?" tanye Merin.
"Jadi luk ini, kemari itu kami inilah berencane midur ke pantai. Tapi urung karene hujan endai jam 8 malam sampai jam 7 hayu, luk mane endak berangkat. Bulih macet motor, tahulah surang kondisi jalan uluk bubur kalu hujan," jelas Pak Beluk
"Kalu jalan hotmix atau aspal. Masih batu kulajukan payu hujan guntur kilap. Ade jalan uluk bubur, empai kene jejah air dikit. Ape agi dilantak hujan malam siang," tambah Pak Beluk.
"Awu nian pule, jalan inilah hampir satu abad dide pernah dibuati. Luk mane nihan anak umat endak lemak, segaje behije payah kalu jalan buruk uluk ini ce, tumpai bani cerai dengan bibai perake jalan ini," balas Merin.
"Na itulah, gara-gara jalan buruk bibaiku lah singut ngan gulai de agi endak besantan," jawab Pak Beluk.
"Bingung batu aku nanggapi cerite kaba ini," kate Merin sambil tetawe halus.
"Cocok jadikan buku cerite mu ini, judulnye gara-gara jalan istriku tidak mau masak santan," sambung Merin.