PAS libur kemaghi Ndung Yung bini Pak Beluk kebingungan ngan tingkah lakinye.
Sebab, mulai njak akap sampai ke siang, Pak Beluk tu maju kuluh kilir ndik keruan anguk di dalam rumah tu.
Karene lah bene sekaligus penasaran, laju betanyela Ndung Yung ngan lakinye.
"Ui Bapang Yung, tape die kamu dalaki kuluh kilir, kulu kilir ndik jelas ni," tanye Ndung Yung.
"Adak dide, aku ni nginaki surat menyurat di rumah kite ni," timbal Pak Beluk.
"Surat tape die pule," Ndung Yung masih penasaran.
"Amun ye ini surat nikah kite. Anye ngape die aneh awah," uji Pak Beluk.
"Aneh luk ape. Tape die pule ye aneh ngan buku nikah kite tu," tanye Ndung Yung tambah penasaran.
"Njak tadi maju aku bandingkan dengan, SIM, KTP, ATM dan lainye. Amun, kartu lain, kinakku ade gale tanggal kadaluwarsanye. Anye, ngape di buku nikah ni dide bedie awah," Pak Beluk njelaska luk ndik besalah.
"Tape kate kaba! Mangke ngape nian kaba ndak nginaki tanggal kadaluwarsa di buku nikah tu. Ape lah dide tahan agi kabah ngan aku. Ngiciklah ndak luk ape kabah," Ndung Yung langsung ngangat ndengar penjelasan Pak Beluk.
"Anu, anu, nide aku tu cuman becanda saje sayang," kate Pak Beluk lah ketakutan.
"Tape die sayang-sayang. Lum ke tetepu aku ngan kamu sayang kamu tu," Ndung Yung masih marah.
Ndengar bininye lah marah-marah terus, langsung tediam Pak Beluk sambil bepikir kenan.
"Adak balak gawih ni tadi. Adak.ampir saghak peci tini tadi. Kah luk ape tini ui. Ampun nian aku. Nggub agi aku becanda ye luk itu," gumam Pak Beluk dalam ati.