Petang kemaghi Pak Beluk dengan Merin pegi ke Kotak Besak. Due sekawan ini pegi pakai setum Merin.
Kebetulan pule, Pak Beluk ni diajung nyupir. Sebab, Merin katenye masih litak nian.
Singkat cerite, pas lah setengah perjalanan perut Merin lah terase lapar nian. Jadi, Merin ngajak Pak Beluk berenti kudai mangke pacak makan.
"Ngape lah neruduk busung aku ce, kalu lemak berenti kudai kite ni," kate Merin.
"Tanggung ce, kele di guk simpang besak kele saje," timbal Pak Beluk.
Singkat cerite agi, karene lum lasung makan, due sekawan ni langsung melanjutkan pejalanan agi.
Anye, lum lame bejalan Merin ngulang ngicik lapar agi.
"Lapar nian aku tu ce. Ngape asenye ade embau sebelak pule. Tambah njadi nian lapar aku ni," kate Merin.
"Ciumilah kudai embau sebelak tu. Kenyang sughang kele," timbal Pak Beluk luk adak.
"Awu nian pule, harum nian embaunye dalam setum ni ce. Ngape luk ngikuti kite ni embau sebelak tu," kate Merin.
"Itulah saking ajaibnye kentut aku tu. Pacak njadi embau sebelak. Ndik rugi kaba bekawan ngan aku ce," uji Pak Beluk pede nian.
"Mati Bujang..!! Embau kentut kaba bearti tini tadi. Wai beduse besak nian kaba ni Bapang Yung. Dide nian betebuk ati kaba ni," Merin langsung ngangat dan laju luk ndak temutah.
"Udemlah pule ce, tadi kate kaba harum luk embau sebelak. Ngape pule kaba luk ndak temutah. Nikmatin aja," kate Pak Beluk sambil nyengir-nyengir.
"Ude berenti kudai. Mbuyu idapan kaba ni Bapang Yung," kate Merin ye dide tahan agi.