WALAU Pilkada Serentak 2024 lah cukup lame selesai. Anye suhu politik di desa badah Pak Beluk masih panas. Justru kini, antarkubu pendukung Cakada tambah neman bepangutan.
Situasi ini mengundang keprihatinan oleh Pak Kades setempat. Die merasa sedih sekaligus ringam melihat kondisi warganye itu. Emosinye pecah saat menyampaikan kata sambutan saat takziah di ghumah warga desanye.
"Assalamualaikum warahmatullahi wabarakatuh. Sebenarnye, luk ini lah gunenye kite hidup bertangge itu. Kalau ade ye dapat musibah, maka tugas tetangga ye lain untuk menghibur. Betul dide adik sanak," kate Pak Kades.
"Betul," jawab jemaah takziah.
"Amu betul. Jadilah kudai kamangan dengah ni saling panguti saling sindiri. Pemilihan lah udem. Pemenang lah keruan siape. Mangke tape gati agi rombongan kamu ni masih bepangutan," emosi Pak Kades meledak.
"Dide bedie gunenye kamu saling pangut saling sindir awak bertangge bahkan masih keluarge. Jeme naik kapal, kamangan denga ye mabuk. Jeme ghulih jabatan, kamu ghulih bigalnye," jijih Pak Kades.
"Mangke sikok agi ku tekankah. Amun dide berani kalah, jangan jadi tim pemenangan. Jadi pemilih biase mangke ndik ade beban tanggung jawab di luar nganjuk pilihan," kate Pak Kades agi sambil nginak nga Pak Beluk nga Merin ye memang jadi koordinator desa pemenangan Cakada di desanye.
Saat itu Pak Imam masjid bersuare, "Mohon maaf, Pak Kades. Aku rase dide tepat kalau ini disampaikan saat suasana duka luk ini".
"Mohon maaf, Pak Imam. Aku sadar kalu ini dide tepat disampaikan dalam suasana luk ini. Tapi ini sangat penting disampaikan nga warga desa kite ini," kate Pak Kades.
"Tujuan kite ke sini adalah untuk menghibur ahli musih dengan mengelar takziah. Anye, dengan kite ye masih saling panguti nga saling sindiri ini. Ape kah saudara kite ini akan terhibur," tanye Pak Kades.
Mendengar nasehat Pak Kades ini. Pak Beluk bekate nga Merin, "Guk nian pule awa, Co. Kate Pak Kades ni. Kite yang lah bejuang pasang udem memenangkan. Tapi ape ye dimenangkan tu bakal ingat ape dide awa nga kite".
"Amu pengalaman ye udem-udem. Kebanyakan lupe, Co. Betul kate Pak Kades. Ghuleh bigalnye saje kite amu masih saling puriki," kate Merin. *