KANTIN Pak Beluk jemenye cete – cete gale, anye galak saling budiakh. Bahkan lebih cendrung pembuhung, sebab galak dide nepati janji. Cete alasannye beragi, ade ye berani tahan besumpah segele. Ape lagi kalau tentang kerje, ceki nian kalau waktu bejaju kicik waktu bekumpul pakamm nian. Kalau ngkinak gayanye didekah bakal meleset, meyakinkan. Anye kalau lah bejalan tunggu kudai, biasenye galak di ujungnye dide nepat janji.
“Kalau kite sedang bebagi tugas waktu kumpul ini mantap tegalau nian, dide kah bakal saling tanyei agi,” ungkap Merin dengan kekantinnye.
Nimbal Taun “Yak, sejak mulai disepakati sampai ke ujungnye kie bakal kometmen. Dide bakal nyalahi kesepakatan kite ini”.
Timbal Taun “Au nian, kite ini lanang. Kalau bejanji harus ditepati. Janji itu hutang, jadi kalau dide ditepati mangke beduse nian”.
Sambung Ujang Kericup “Aku yakin dengan kekantin kite ini, anye kalau ditelpon jangan sege nian ngangkat. Mase tiap waktu Hp dipiciti, anye giliran ditelpon dide ngangkat. Aku agak bingung, ape agi lah udim kesepakatan model ini”.
Sintung Buyung Taduk sambil lelinyum “Ukan dide galak ngangkat ce, anye kalu takut ditagih kometmen tu. Semingge Hp dide diangkat, ade alas an ketike ditanye kele”.
Nganing kicik kantinnye agal nyindir, mangke Linun nyahut “Jangan kabah galak berprasangka dide iluk dengan kekantin ce. Dide alap rasenye, dalak kicik yang mbuat kantin agak sejuk”.
Pak Beluk masih mendam, nganing dide agi ade ngicik Pak Beluk mulai bekate “Udim gale nyampaikah pendapat”.
Serentak raban tu njawab “Udim ce, ade ape”.
“Kalau udim aku kudai ngicik. Kalau urusan kesepakatan ini aku yakin kekantin tu mantap. Anye yang mantap pembuhungnye, diawal bakal sesuai kesepakatan. Tapi bejalan kele, ade seja diantare kekantin ye mulai merubah secara beguyur. Sebab kekantin ini pintar gele, anye pintarnye ngeles. Ukan pintar beakal, pintar ngakali,” tutup Pak Beluk madakah. (red)