CERITENYE Yung Pantit beli Hp baru ye diidam – idamkannye.
Nginak Yung Pantit ngecak Hp, injik bapangnye. Anye kenan dide galak nyampaikannye, sebab lah cete kele dijadikan kulhan anaknye. Oleh sebab itulah Pak Beluk mulai mainkah trik mantapnya.
"Yung kalau ade HP rinkih, jangan jadi pedoman nian. Terus belajar, jangan habis waktu musikah HP saje," nasehat Pak Beluk.
Tambah Pak Beluk "Jangan terlalu fokus dengan HP, lah banyak jeme kejadian gara-gara Hp alap ini".
"Kejadian model luk ape bapang," tanye Yung Pantit penasaran.
"Banyak jeme salah gune Hp, misal kabah lumayan pintar, jadi buyan gegara Hp," jawab Pak Beluk.
"Bukan cuman buyan saje, lah bejudi, rusak mate bahkan tejual rete ndung bapang," Pak Beluk ngicik.
Nganing nasehat bapangnye, agak lesu Yung Pantit ni. Tibe-tibe Yung Pantit kepikiran kah ngenjukan Hp barunye ke bapangnye.
“Ai ngeri aku ape ye bapang sampaikah tadi, jadi lukmane aku ini bapang. Ape Hp ini dighi saje ngecaknye, kalau aku perlu aku pinjam saje dengan bapang,” kate Yung Pantit cak polos nian.
"Itu teserah kabah, bapang ini hanye nyarankah saje. Sebab, seumur kabah itu ye paling penting belajar rajin. Supaye kabah pintar, besak kele jadi jeme sukses,” kate Pak Beluk serius 1000 persen.
Timbal Yung Pantit “Au nian bapang, anye aku juga takut pule kalau bapang. Kele Hp lah di dighi, malah nyebabkan dighi tebuyan pule. Semegi ye dighi katekah tadi, main judi online, duit hasil upahan habis beli paket dan segale mene kapuh. Bahkan bepeluang bapang mulai kenalan dengan jande alap, ndung ye purik” kate Yung Pantit santai.
“Dide Yung, bapang ini hanye kah nyimpan HP kabah saje. Kalau kabah sekedar untuk kumunikasi pakai Hp bapang saje, masih pacak main internet kapuh,” kicik Pak Beluk cak adak saje.
"Nah, kini keruan aku bapang nasehati tadi. Bepolitik dighi tu bapang, selire dengan Hp aku ini. Ukan sesuai kicik awal tadi awah, pakailah Hp dighi tulah bapang," tegas Yung Pantit.
Pak Beluk tependam saje, sebab modus die ngakali anaknye diketahui.