Belum lame ini Pak Beluk kene tegur dengan kancenye Merin. Pak Beluk cerite de masuk akal, mase aik sungai kering banyak diminum ikan.
Iluak ini singkat ceritenya.
“Merin, aku kinak kini sungai banyak kering ape pule sebabnye?” uji Pak Beluk
“Yak Pak Beluk, kini lagi musim de hujan amen base kerennye kemarau,” timbal Merin
“Ade pule de musim hujan Merin, anye kini lah galak hujan tapi masih juge aik kering,” sahut Pak Beluk agi.
“Musim ade tige Pak Beluk, musim hujan, musim panas dan musim badai amen di dusun kite ni. Memang hujan lah galak tapi de care padu nihan,” jawab Merin
“Samelah Merin, ujan lah galak tapi aik masih kurang saje,” timbal Pak beluk agi.
“Biase saje Pak Beluk lah galak aiak ni kering de ngape masih pacak minum,” timbal Merin
“Kalu aiak keringni banyak diminum ikan Merin, ikan ni lagi galak minum, ape lagi musim ikan ipun banyak nihan ipun. Pasti juge minum gale,” timbal Pak Beluk.
“Ai cacam Pak Beluk, mase gara-gara ikan minum aik ni kering, kalu ikan buang aik keciak di aiak sungai pule, de ke darat aseku. Jadi de kah ngurangi aik amen ikan minum,” nasehat Merin.
“Itulah jiku Merin, aku kire gara-gara diminum ikan, aik sungai banyak kurang ni,” jawab Pak Beluk.
“Belum ade ceritenye Pak Beluk, aik sungai kering gegara diminum ikan. Mpuk ikan besak lah banyak diambiak jak sungai masih lum kan kering aik sungai ni. Ngajak sebigalan kaba ini,” timbal Merin sambil tetawe pule.