Lum lame 2 sekance Pak Beluk ngah Merin ngikuti pertemuan di ghumah Pak Kades. Ughang 2 ni agak aktif men jajunye di desa. Empuk kerje banyaklah ngajung jeme.
Pertemuan terbatas. Jadi endik pule rami nian. Ade belasan kecik yang datang ni.
Empuk pertemuan kecik, masih nengahkan makanan ringan Pak Kades ni. Rerombongan gegorengan nilah. Men kopi endik nian tinggal. Dulu sekali. Men Pak Beluk mesan khusus, kopi lanang alias kopi ndik begule.
Perendengan pertemuan maju Pak Beluk naguni gegorengan ni.
“Ui ambiklan Rin. Mumpung masih angat,” uji Pak Beluk lah ngambik gorengan di piring muke Merin duduk.
Tape di piring muke kenan tinggal sikuk agi isi gorengannye.
“Kabah ni kelaparan Pak Beluk. Mase gorengan lah sepinggan abis, ini lah pinggan kedue pule,” Merin agak kesal.
“Adak ndik lapagh, kesukaan aku nian men gegorengan ni,” timbal Pak Beluk, luk adak.
“Aku agak aneh kaba ni ndik serile. Biasenye lebih kencang. Amun puase, denie ni malam. Ape ade puase malam,” Pak Beluk ngucak’i Merin.
“Ui nduk ai, aku gigi sakit. Kaba ni maju bemime ni!” kate Merin agak ngegas.
“Adak sabar saje ce. Ini nah udim aku kunyah, pacak selangsungan saje, endik perlu kaba kunyah agi,” kate Pak Beluk sambil ngeluarkan gorengan di mulutnye.