Ndalak Aman

Reporter: Bahman Hadi |

Editor: Dedi Julizar |

Selasa , 19 Nov 2024 - 21:08

Pak Beluk--

ndalak aman                            belum lame ini pak beluk beghusik dengan kancenye yang lame, siape lagi kalu bukan merin. panjang libar bedue tu cerite, jak rege kawe, sawit sampai buah pisang.
semingge kerje jeme di jagatni ampir tuntas diceritkah gale. pak beluk riang nihan di ghumah merin. aik kupi segelas besak betangkai dengan guring pisang libagh ade gale.
anye saje madakah masalah udutan. pak beluk dengan merin mpuak same putih udutan, anye saje merek kualitasnye beda. merin udim mupuk kawe rokok bedencing mantap. 
pak beluk mpai ndak nanam kawe, itu gegare rege mahal senampur tadi. kalau sawit mpai bejantung sebatang due, wajar saje udutannye biase saje.
“mbak mane pak beluk lah panen sawit,” kate merin
“belum merin, mpai bejantung sebatang due, dikit pule. cuma cube saje,” timbal pak beluk
“kalu aku lah panen sawit, anye jeme gale ngurusnye. njak njuluk sampai ngojek jeme gale, aku di ghumah saja untai-untai keting,” jawab merin
“lemak kaba merin, amen akuni ibarat kate jeme ketinggalan, jeme bekebun, aku masih sibuk mancing di sungai nilah,” uji pak beluk.
“sesabar saje pak beluk, untungnye kabah galak makan gulai lemak. sebab galak mancing, dide beli ikan,” uji merin cak pakam nian.
“yak guyurkah ce makan guring libarni. dide ngape aku nawari,” uji pak beluk sambil cecengis unte.
“au pak beluk, kite makani guring ini. banyak tue ini, pas pule musim hujan pule,’ timbal merin cak tekejut.
“kalu kami, namenye ini pisang jantan. banyak juge jeme ngicik base dusun pisang jao,” uji pak beluk.
“same kami masih nyebutnye pisang jao, tapi amen pisang jantan nemane pule,” jawab merin.
“au nian merin, pisang jantan dengan pisang jao apo bedanye,” uji pak beluk.
“ye mane pule pisang jantan. kalu pisang jantan, pisang dide bebuah ce,” timbal merin.
“kalu same saje pisang jantan dengan pisang jao ni merin,” uji pak beluk.
“au pak beluk, amen warnenye lah kuning buah pisangni ni namenye lah masak gale. lah pacak diguring,” jawab merin.
dalam ati pak beluk “pisang jantan dengan  pisang jao semegi. aku ni didekah bedebat, ndalak aman saje. ye penting makan guring angat dari pade mandi hujan.

Tag

Share

Koran Terkait

Kembali ke koran edisi Radar Kaur, Rabu 20 November 2024

Berita Terkini

Berita Terpopuler

Berita Pilihan